|
|
„დიო“ განაგრძობს აქტიურ ჩართულობას CSR პროექტებში. გლდანის პროფესიული მომზადების ცენტრთან პარტნიორობა საკმაოდ მნიშვნელოვანი პროექტია, რომლის ფარგლებშიც, კომპანიის პროფესიონალები შეასწავლიან დაინტერესებულ პირებს არაერთ საინტერესო პროფესიას. გარდა ამისა, სტუდენტებს შესაძლებლობა ექნებათ ისარგებლონ „დიო“-ს მიერ მოწყობილი სასწავლო ოთახით, სადაც შეხვდებიან ინტერიერისა თუ ექსტერიერის პროდუქტის ნიმუშებს და გაეცნობიან მათ შესახებ ინფორმაციას.
ამჟამად მიმდინარეობს კურსი - „ალუმინისა და მეტალოპლასტმასის კარ-ფანჯრებისა და მზისგან დამცავი სისტემების მონტაჟი“, რომლის ფარგლებშიც, „დიო“-ს გამოცდილი კადრები - რეგიონალური და სადილერო გაყიდვების დეპარტამენტის ხელმძღვანელი ანი ბუხიაშვილი, ექსტერიერის პროდუქტების გაყიდვების დეპარტამენტის ხელმძღვანელი გიორგი ჩიხლაძე, აზომვების ექსპერტი კახაბერ ყარსიმაშვილი და სამონტაჟო ჯგუფის უფროსი დავით ალადაშვილი 3 თვის განმავლობაში გლდანის პროფესიული მომზადების ცენტრში შეასწავლიან სტუდენტებს მონტაჟისთვის საჭირო ყველა კრიტერიუმს, ხოლო პრაქტიკულ ნაწილში ესტუმრებიან „დიო“-ს საწარმოს, სადაც დააკვირდებიან იმ პროცესებს, რომელსაც გადის პროდუქცია შეკვეთის მიღებიდან მის მონტაჟამდე. კურსის წარმატებით დასრულების შემდეგ სტუდენტებს შესაძლებლობა ეძლევათ დასაქმდნენ „დიო“-ს საწარმოში.
„აღნიშნული პარტნიორობის მიზანია ხელი შევუწყოთ პროფესიული განათლების პოპულარიზებას, რომელიც სამომავლოდ არაერთ ადამიანს დაეხმარება გახდეს პროფესიონალი და დასაქმდეს მაღალანაზღაურებად სამსახურში.“ - აცხადებენ „დიო“-ში
სამომავლოდ საინტერესო და ნაყოფიერი პროექტები იგეგმება გლდანის პროფესიული მომზადების ცენტრთან პარტნიორობის ფარგლებში, რომლის შესახებ ინფორმაციაც პერიოდულად განთავსდება „დიო“-ს ვებ-გვერდსა და სოციალურ ქსელებში.
